من فتره مش طويله وتحديداً بعد نهاية ماتش السيتي وبرشلونة في الاتحاد كنت بشييد بجوارديولا وبمدحه لانه تنازل عن أفكاره (الاستحواذ) لما ادرك ان امكانيات فريقه ماتسمحلوش انه ينفذ افكاره المفضلة قدام المنافس واتجه الى اسلوب تانى (اسلوب يورجن كلوب) وكان هو الحل الأمثل.. والنهارده انا بنتقد بيب جوارديولا لانه رافض التنازل عن افكاره فى البريميرليج الغير قابله نهائيا للتنفيذ في دوري صعب زي الدوري الانجليزي!!!

طريقة 3-6-1 مع جوارديولا أثبتت فشل زريع من اول ماطبقها بيبب ومن قبل مايطبقها وانا بنتقده عليها، لكن الحقيقه النهاردة قصاد ليستر كان اسوء ماتش تقريباً من ساعة ماطبق الطريقة دي ويمكن الاسوء في تاريخ بيبب كله..

الكوره مش عند، ولما تشوف ان طريقة لعبك واسلوبك هما اكتر حاجة بيحبهم المنافس بتاعك وبيعرف يلعب عليهم كويس اوي يبئه لازم تغيرهم، انما ده مش في منطق بيبب..

ليستر سيتى معروف من السنه اللي فاتت ان اسلوب لعبهم بيعتمد على الانتظار ورا الكوره ب9 لاعيبه واستدراج المنافس لأبعد مكان ممكن عن منطقة جزائه وبعد كده قطع الكوره ولعب كوره طويله في ضهر الdefense لافضل poacher في العالم حاليا جيمى فاردى او كسب الكوره التانية والاستفادة منها في تسجيل الاهداف..

وكأني ماقولتش حاجة وكأن ليستر عمرهم مالعبو كده وكأن جوارديولا عمره ماشاف ليستر قبل كده وعمره اصلا مالعب في الدوري الانجليزي.. 
دخل بيبب الماتش ب3-6-1 ب3 مدافعين منهم اصلا اتنين Fullbacks وواحد centerback وكالعادة الاتنين الاطراف Attackingwingers مش Fullbacks 
اعتمد بيبب ع الاستحواذ والتقدم بأكبر قدر ممكن لمناطق ليستر والابتعاد عن منطقة جزاءه وترك مساحات كبيييييييره في دفاعه وليستر دخل بأسلوبه المعتاد وقف ورا واستنا وقفل صح ورما الكوره في ضهر الدفاع لفاردي او محرز واوقات تانيه استنا الكوره التانية وقدر بأقل قدر من اللمسات ينفذ نماذج للمرتدات وبأقل المحاولات قدر يسجل اهداف، ولما تقول لبيب اومال انت هتستخلص الكوره ازاي يقولك بالضغط في نص ملعب المنافس، طب انت هتضغط ازاي في نص ملعبهم وهما اصلا مش بيحضروا على الارض وبيلعبو الطويله في ضهر دفاعك؟؟؟ يبئه مافيش غير حل واحد بس عشان نستخلص الكوره في نص ملعبهم وهو اننا نركب للاعيبه جناحات عشان يطيروا ويجيبوا الكوره وهي في الهوا..

طبعاً 4 نتيجه قليله وبيب كان يستاهل يدخل فيه اكتر من كده بكتير، لكن احنا بنرجع ونقول ان طالما الواحد بيتعلم من غلطه خلاص انما المشكلة ان دي مش اول مره جوارديولا يلعب ب3 ورا في البريميرليج ومايكسبش والمشكله الاكبر ان دي مش اخر مره هيلعب فيها ب3 ورا، لانه خرج بعد الماتش وقال "سأستمر بلعب كرة القدم التى اريدها لاننا لم نكن سيئين اليوم"