بعد خسارة نهائي دوري الأبطال والخروج من البطولة العربية ، كابتن الخطيب وعد برد فعل .. وقال ميعادنا نهاية يناير ..

النهارده 1 فبراير ..

الأهلي عمل أفضل سوق انتقالات ممكنة (مع الاعتراف ان الفريق لسه محتاج دعم ، إنما عارف ومتأكد ان ده هيحصل ، وعندي معلومة مؤكدة إن التخطيط لفترة الانتقالات الصيفية بدأ بالفعل ومن فترة) .. غالبية النواقص تم التعامل معها بشكل كويس جداً في حدود المتاح ..

الأهلي جاب جهاز فني محترم .. وبدأ شغله يبان مع الوقت .. واعتقد خياراته الأخيرة في القائمتين المحلية والأفريقية بتؤكد انه واقعي وذكي وإن شاء الله يقدر يحقق النجاح المطلوب منه ..

الأهلي أعلن عن رعاته الجدد .. الراعي الرئيسي نفذ كل طلبات الإدارة ، وعمل خطوة غير مسبوقة بتغيير علامته التجارية مخصوص عشان خاطرنا ..

الأهلي أعلن عن قميصه الجديد المحترم جداً واللي لا يقارن باللي كان موجود على مدار السنين اللي فاتت .. واتفق فعلياً على لبس الموسم الجديد وألوانه ..

الأهلي بدأ تطوير منظومته الطبية والمفروض الأجهزة الجديدة اللي هتساعد جداً في الاستشفاء هتوصل الشهر ده إن شاء الله ..

الأهلي بياخد خطوات عشان جمهوره وسط مضايقات لا حد لها .. وللأسف فيه كلام مينفعش يتقال .. بس الأكيد ان الادارة بتسعى وبتحاول بكل طاقتها وجهدها ، وبتخاطب كل الجهات بقدر استطاعتها .. ولسه فيه شغل تاني ..

الأهلي بيدافع عن حقه بكل الطرق "الشرعية والقانونية" المتاحة .. وحط تحت "الشرعية والقانونية" دي ألف خط .. مش ذنبه إن غيره ميعرفش غير البلطجة وقلة الأدب وشرا الناس بفلوسه .. المهم انه مش ساكت ، وبيدافع عن نفسه وعن حقوقه بقوة ..

الخلاصة .. إن اللي وعد بيه "رئيس مجلس إدارة النادي الأهلي" وفى بيه بنسبة كبيرة جداً .. ومن حقه علينا إننا نقول له شكراً ، ونقف معاه وجنبه ..

مش معنى كلامي إننا خلاص مثاليين والحياة وردي وكل حاجة اتصلحت .. لسه طبعاً فيه أخطاء وفيه شغل كتير لازم يتعمل .. بس للأمانة والصراحة اللي اتعمل وبيتعمل شيء محترم .. شيء يليق بالراجل اللي وقفنا وراه ووثقنا فيه هو واللي معاه .. ويستحق إننا نقول له "استمر .. احنا معاك" ..